Дарко Чурлинов нема да биде со македонската А-репрезентација на натпреварите против Швајцарија, Словенија и Шкотска во периодот од 26 септември до 6 октомври. Фудбалската федерација на Македонија официјално соопшти дека причината е административна процедура поврзана со неговиот престој и работен статус во Полска.
Клубот Погон Шчеќин, за кој настапува Чурлинов, доцна ја започнал постапката за потребната документација за работа и престој. Според ФФМ, фудбалерот подолго време е во Европската Унија без да ја напушти нејзината територија. Правилата за краток престој во Шенген-зоната го ограничуваат престојот без соодветна дозвола на 90 дена во период од 180 дена. Ако сега ја напушти ЕУ за да се приклучи на репрезентацијата, при повторното влегување во Полска би можел да биде предмет на проверки и евентуални санкции поради пречекорување на дозволениот период без соодветни документи.
ФФМ била известена непосредно пред официјалниот собир, иако поканата до клубот била испратена три недели претходно. Од Полска стигнала информација дека за комплетирање на постапката се потребни најмалку две недели. Поради тоа, Чурлинов во моментов не може да ја напушти Полска без ризик за својот иден статус.
Федерацијата останува во контакт со сите страни. Таа ја известила амбасадата на Македонија во Полска, а за случајот е известена и УЕФА. Селекторот Гоце Седлоски ќе одлучи дали ќе повика друг фудбалер наместо Чурлинов.
Целото соопштение е на страницата на ФФМ.
