Македонскиот репрезентативен голман Столе Димитриевски беше херој на Валенсија во победата од 1-0 на гостувањето кај Елче во 11тото коло од Ла Лига. Димитриевски во последната минута од судиското продолжение одлично интервенираше и ги сочува трите бода за својот тим.
Елче поголемиот дел од натпреварот имаше иницијатива и посед од 69 отсто, но Валенсија беше поефикасна. Победничкиот гол го постигна Умар Садик во 69тата минута, девет минути откако влезе во игра. Нигериецот, кој се врати по два месеци пауза поради повреда, го заврши брзиот контранапад по асистенција на Арнаут Данјума, пренесува Марка.
Елче во првото полувреме имаше 73 отсто посед и создаде неколку добри шанси, а Димитриевски со тупаници го одби силниот удар од дистанца на Рој Ревиво, пишува Мундо депортиво. Клучната одбрана дојде во 94тата минута, кога го спречи ударот на домаќините, кој изгледаше како сигурен гол.
Натпреварот на стадионот „Мартинес Валеро“ го следеа 28.360 гледачи. Елче, кое го води Мартин Анселми, пред ова коло имаше серија од четири натпревари без пораз и успеа да излезе од зоната на испаѓање, но сè уште нема победа на свој терен сезонава.
„Садик постигна гол, Димитриевски спаси“, гласи насловот на шпанскиот Ас во оценките на играчите на Валенсија.
Порталот за статистика Фотмоб го прогласи Димитриевски за играч на натпреварот, со оцена 7,9.
Ова е прва победа на Валенсија откако тимот го презеде Хавиер Агире и втора во првенството сезонава. Димитриевски уште еднаш потврди дека е во одлична форма во една од најсилните лиги во Европа.
