Лука Дончиќ продолжува со неверојатната серија на почетокот на сезоната во НБА. Словенечкиот плејмејкер забележа 53 поени, пет скока и пет асистенции во победата на Лос Анџелес Лејкерс над Портланд Трејл Блејзерс со 124-118 во рамките на НБА купот.
Лејкерс заостануваа и со 16 поени во вториот период, а пресвртот го најави неверојатната тројка на Дончиќ на крајот од првото полувреме. Дончиќ шутираше од околу 19 метри, топката удри во таблата и заврши во кошот, со што заостатокот се намали на седум поени.
„Мислам дека тоа ја менува целата енергија во тимот и во салата. Сметав дека е важно да го погодам тој шут, затоа одлучив да го погодам“, рече Дончиќ со насмевка по натпреварот, пренесува Асошиејтед прес.
Во третата четвртина Словенецот постигна 20 поени и сам беше поефикасен од целата екипа на Портланд. Во финишот, кога предноста од 12 поени се стопи на четири, Дончиќ погоди клучен шут од рекетот на 28 секунди пред крајот.
Ова е неговиот втор натпревар со над 50 поени оваа сезона, по 52-те поени против Јута на 25 октомври. Според Лос Анџелес тајмс, ова е неговиот четврти натпревар со 50 и повеќе поени во дресот на Лејкерс, со што го престигна Леброн Џејмс и се изедначи со Џорџ Микан.
Дончиќ има вкупно 11 натпревари со најмалку 50 поени во кариерата, со што се изедначи со Ален Ајверсон. Според И-ес-пи-ен, тој е петти меѓу активните играчи според овој учинок, зад Џејмс Харден, Стеф Кари, Дамијан Лилард и Леброн Џејмс.
Словенецот бележи просек од 40,1 поен по натпревар, највисок во кариерата, а ова му е шести натпревар оваа сезона со над 40 поени. Лејкерс имаат осум победи во десет натпревари на почетокот на сезоната.
Кај Портланд најефикасни беа Дамијан Лилард и Дени Авдија со по 22 поени, а Донован Клинган додаде 14 поени и 11 скока.
