Баерн Минхен и Борусија Дортмунд одиграа 2-2 во „Дер Класикер“ на „Алијанц арена“. Хари Кејн промаши пенал за домаќините, а резервистот Фабио Силва во 89тата минута постигна гол за конечниот резултат, пренесува официјалниот портал на Бундеслигата.
Баерн доминираше уште од почетокот, а Мајкл Олисе во 10тата минута ја погоди стативата. Дортмунд во 34тата минута ја затресе мрежата преку Џоб Белингам, по грешката на Дајо Упамекано, но ВАР го поништи голот поради прекршок на Карни Чуквуемека врз голманот Јонас Урбиг.
Четири минути подоцна Баерн поведе. Олисе го искористи погрешното додавање на Феликс Нмеча и го проигра Конрад Лајмер, кој ја смести одбиената топка во мрежата откако Грегор Кобел го одбрани првиот удар. Баварците уште во првото полувреме ги загубија Исмаел Саибари и Серж Гнабри, кои го напуштија теренот поради повреди.
Во 57тата минута Кејн, за кого ова беше прв натпревар по освојувањето на Златната топка, ја погоди пречката од пенал. Три минути подоцна Серу Гираси, по асистенција на Чуквуемека, израмни на 1-1. Англичанецот во 66тата минута со глава му асистираше на Упамекано за 2-1, а потоа уште еднаш ја погоди стативата, пишува Скај спортс.
Дортмунд до крајот го бараше изедначувањето и стигна до него една минута пред истекот на регуларното време. Константинос Каретсас го блокираше обидот на Александар Павловиќ да ја исфрли топката, а Силва со низок удар го погоди далечниот агол. Во последната акција на натпреварот Ленарт Карл ја погоди пречката на гостите.
Баерн имаше огромна предност во очекуваните голови, 4,83 спрема 0,7, но тимот на Нико Ковач го задржа бодот. Двата тима и понатаму имаат ист број бодови на врвот на табелата, а Баерн останува прв поради подобрата гол-разлика.
Баварците играат без тренерот Венсан Компани, кој се опоравува, а листата на повредени, на која веќе беше Луис Дијаз, сега ја надополнија Саибари и Гнабри.
