Ланс се разделил со тренерот Јаник Каузак, само два месеци откако тој ја презеде екипата, според информацијата што ја објави Екип, а ја потврди и регионалната редакција Иси Нор, пренесува Франсинфо. Клубот засега нема објавено официјално соопштение.
Одлуката ја донел управниот одбор по третиот пораз во низа, со 1-2 од Марсеј на домашен терен во неделата. Четири дена пред тоа, Ланс беше понижен со 1-9 од Комо во Лигата на шампионите, а една недела порано го загуби и дербито на северот против Лил со 0-1.
Поразот од Комо со осум гола разлика го израмни рекордот за најубедлив пораз во Лигата на шампионите, наведува Гардијан. Пред мечот со Марсеј, навивачите истакнаа транспарент со кој ги нарекоа играчите срамота.
Поранешниот капитен на Ланс беше унапреден од помошник во главен тренер на 15 септември, по заминувањето на Германецот Дино Топмелер, кој беше првиот тренер во француското првенство што остана без работа оваа сезона, по само четири кола.
Ланс моментално е на 11тото место во првенството и загуби четири од последните пет натпревари во сите натпреварувања. Во Лигата на шампионите екипата сè уште нема освоено бод, по поразите од Спортинг, Клуб Бриж и Комо.
„Чувствуваме дека сме во лоша состојба. Чувствуваме дека резултатот од средата остави трага“, призна Каузак по поразот од Марсеј.
Ланс веќе има список со тројца кандидати за наследник, а меѓу нив е и Пјер Саж, кој сè уште формално е тренер на Кристал Палас, пишува Јаху спорт. Саж минатата сезона со Ланс го освои Купот на Франција и го заврши првенството на второто место.
Според Гардијан, сопственикот Жозеф Огурлијан останал во близок контакт со Саж и е наклонет кон неговото враќање. Палас одлучи да се раздели со Французинот по поразот од Ливерпул со 3-1, но разделбата сè уште не е официјална, бидејќи траат преговорите за обештетувањето.
