Австриските власти интензивно работат на расветлување на околностите од тешката несреќа во која настрада поранешниот голман Александар Манингер.
Несреќата се случи во мало место Нусдорф ам Хаунсберг близу Салцбург, а во истрагата е вклучен и сообраќаен експерт Герхард Кронрајф за да се реконструира секој детал од настанот.
Иако жестокоста на судирот речиси го уништи возилото, истражителите имаат важна предност – станува збор за понов модел автомобил што овозможува детална анализа на податоците.
Експертите моментално анализираат информации од контролните единици на возилото, вклучувајќи го системот на воздушни перничиња и работата на моторот. Врз основа на тоа, ќе се обидат да ја утврдат брзината на движење пред судирот, како и користењето на педалите за гас и кочница.
Покрај тоа, ќе се реконструираат и движењата на управувачот за да се утврди дали Манингер се обидел да ја избегне несреќата.
Во фокусот на истрагата се и податоците поврзани со возот што учествувал во судирот, како и трагите на преминот, вклучувајќи ги отпечатоците од гумите.
Целта е што попрецизно да се утврди текот на настаните, односно кој и во кој момент можел да ја забележи опасноста и дали трагедијата можела да се избегне.
