Николо Булега го заврши своето поглавје во Светското првенство во Супербајк токму онака како што ја возеше целата сезона – со победа. Шампионот со Дукати победи и на втората трка од последната рунда во Херес и стигна до 52рата победа во серијата, колку што има и легендарниот Трој Бејлис.
Булега во неделата претходно победи и на Суперпол трката, а во саботата славеше и на првата трка, со што викендот во Андалузија го заврши со хет-трик. Со 52 победи тој се изедначи со Бејлис на петтото место на вечната листа во Супербајк, а ќе остане запаметен и како последниот победник на трка со гумите на Пирели, кои по оваа трка го напуштаат шампионатот, наведува ВорлдСБК.
Неговиот тимски колега Икер Лекуона подобро стартуваше и прв влезе во првата кривина, но Булега уште во шестата кривина од првиот круг го презеде водството. Италијанецот потоа постепено ја зголемуваше предноста и на крајот ја мина целта 4,696 секунди пред Шпанецот, со најбрз круг на трката од 1:37.573.
Најголемата драма се одвиваше во борбата за третото место. Во последните пет круга на патеката почна да врне дожд, а Сем Лоус, кој дотогаш заостануваше зад Алваро Баутиста, почна брзо да ја намалува разликата. Британецот го престигна Шпанецот во петтата кривина од последниот круг и му го одзеде местото на подиумот на двократниот светски шампион.
Баутиста на крајот беше четврти, во трка која можеби му е и последна во Супербајк, а при враќањето во боксот беше пречекан како херој. Петти заврши Јари Монтела, кој во финишот го престигна Лоренцо Балдасари. Алекс Лоус и Аксел Басани со Бимота беа седми и осми, Алберто Сура деветти, а Мигел Оливеира со БМВ ја заокружи првата десетка.
Ова беше последна трка и за Хави Вјерже во дресот на Јамаха, кој од следната сезона преминува во тимот Барни Дукати, а можно е ова да бил последен настап во Супербајк и за Данило Петручи. Трката во Херес ја следеа 40.827 гледачи, пренесува Спидвик.
Булега ја заврши сезоната со 726 бода, повеќе од двојно во однос на вицешампионот Монтела, кој собра 318, додека Алекс Лоус е трет со 259 бода. Уште по Суперпол трката Италијанецот стана првиот возач во историјата на Супербајк со над 700 бода во една сезона и стигна до 35тиот подиум во сезоната, со што го собори рекордот на Џонатан Реј од 34.
Од следната сезона 27-годишниот Италијанец се сели во МотоГП. Фабричкиот тим на Дукати за последната трка подготви и посебен изглед на мотоциклите, во чест на легендарниот модел Имола 750 Десмо од седумдесеттите години.
