29 годишниот повремен македонски репрезентативец, Крсте Велкоски се врати во редовите на Сараево.
Велкоски претходно го носеше дресот на Сараево од 2014 до 2016 година и стана миленик на навивачите на клубот. Во тој период стружанецот ја освои шампионската титула во првенството, како и купот на Босна и Херцеговина.
Во двете сезони кои ги помина во Сараево Велкоски на 75 натпревари постигна 31 гол, запиша 21 асистенција и со таквите игри обезбеди место и во репрезентацијата на Македонија.
„Пресреќен сум и задоволен поради враќањето во Бордо фамилијата, од која никогаш не заминав. Во Сараево освоив два трофеи и ги понудив најдобрите игри во мојата кариера. Секако, се надевам на продолжение на добрите резултати во дресот на Сараево зошто за овој клуб ме врзуваат најубави емоции и спомени“- коментираше Велкоски по потпишувањето на договорот.
Од Сараево интерес за услугите на Велкоски имало и пред неколку месеци, но тогаш напаѓачот се одлучи да остане во Азија потпишувајќи за тимот на Корат од Тајланд.
