Фудбалерите на лондонски Челзи се пласираа вечерва во полуфиналето на Лигата на конференции, иако на свој терен беа поразени со резултат 1:2. Во вечерашниот реванш на „Стамфорд Бриџ“ Челзи влезе со дури три гола предност од првиот натпревар против Легија (3:0), но гостите, ослободени од резултатскиот императив, сакаа значително да го подобрат впечатокот од тој дуел.
И, веќе во деветтата минута, Јоргенсен изврши прекршок за пенал доделен за гостите, а сигурен од белата точка беше Пекарт, кој на Легија и донесе водство од 0:1. Одговорот на Челзи се чекаше до 33. минута кога Санчо одлично центрираше од десната страна, а Кукуреља беше на право место и од непосредна близина ја погоди мрежата за 1:1.
Тој резултат остана до крајот на првото полувреме, а на почетокот од второто полувреме екипата на Легија повторно заигра подобро и по само осум минути игра во продолжението тимот од Варшава повторно поведе. Овој пат голот беше постигнат по корнер од лева страна, а во турканицата пред голот на домаќините, Гонзалвеш ја проследи топката до Капуадија, кој ја погоди мрежата на голманот на домаќините и го постави конечниот резултат 1:2.
Фото: Chelsea FC/FB
