Алеиш Еспаргаро повторно ќе вози трка во МотоГП. Хонда официјално потврди дека развојниот возач ќе го замени Жоан Мир во фабричкиот тим Хонда ХРЦ Кастрол на Големата награда на Индонезија овој викенд на патеката Мандалика, објави MotoGP.com.
Мир и понатаму се опоравува по совет на лекарите и ќе ја пропушти трката, а од тимот најавија дека дополнително ќе објавуваат информации за неговата состојба. Шпанецот веќе ја пропушти и Големата награда на Јапонија.
Мистериозни симптоми кај Мир
Шампионот од 2020 година подолго време се соочува со здравствени проблеми. Тој мораше да се повлече од трката во Сан Марино, а потоа ја пропушти и Големата награда на Австрија. Според соопштението на Хонда ХРЦ од 22 септември, Мир со месеци има различни симптоми што влијаат на неговата енергија и на перформансите, а испитувањата во болницата Дексеус во Барселона сè уште не дале конечна дијагноза.
„Поради нивната упорност и сериозност, Мир се подложува на серија тестови со цел да се дојде до дефинитивна дијагноза. Медицинскиот совет е строг одмор и различни третмани во наредните 15 дена“, изјави тогаш главниот медицински директор на МотоГП, д-р Анхел Чарте.
Еспаргаро со реални очекувања
За 37-годишниот Каталонец ова ќе биде прв тркачки викенд по Големата награда на Валенсија во 2025 година. Еспаргаро има три победи и 12 подиуми во МотоГП, а во кралската класа помина 14 сезони како редовен возач. Сезоната ја почна со тешка повреда на тестирањата во Сепанг, кога доживеа фрактура на четири пршлени, а подоцна имаше и операција за отстранување на металните плочи и шрафови од грбот, пишува Crash.net.
„Секогаш е голема чест да се приклучам на фабричкиот тим на Хонда во МотоГП и сакам да им се заблагодарам што ми ја довериле оваа улога додека Жоан и Така се опоравуваат“, изјави Еспаргаро. „По падот на почетокот на годината и повредата немав онолку време на мотоцикл колку што би сакал, па во Мандалика одам со реални очекувања. Имам само мал број кругови, а патеката е навистина физички напорна, а да не зборуваме за временските услови.“
Хонда немаше многу опции. Такааки Накагами го скрши клучното коскиче при падот во Мотеги и мораше на операција, а Сомкиат Чантра, кој го возеше мотоциклот на Мир во Јапонија, овој викенд има обврски во Светското првенство во супербајк во Есторил, пренесува Motorsport.com.
Еспаргаро во Индонезија ќе вози заедно со Лука Марини, а по викендот повторно ќе се посвети на развојната работа со Хонда, објави GPOne.
