Кошаркарите на Партизан доживеаја болен пораз во осмото коло од Евролигата. Белградскиот тим во Лион водеше со 11 поени разлика во последната четвртина, но Асвел со неверојатна завршница стигна до победа од 82-75.
Домаќините подобро го започнаа натпреварот и по првата четвртина водеа со 22-19, а на полувреме заминаа со предност од 36-32. Партизан се врати многу посилен во третата четвртина, ја доби со 27-20 и пред последниот период водеше со 59-56.
Црно-белите продолжија во ист ритам и на почетокот на четвртата четвртина ја зголемија предноста на 69-58. Нешто повеќе од четири минути пред крајот сè уште водеа со 73-65, но потоа сè се промени, пишува официјалната страница на АБА лигата.
Краудер го реши натпреварот
Тремонт Вотерс, Пети Милс и Иго Бесон го предводеа пресвртот на Асвел, а искусниот Џеј Краудер со два важни коша му донесе водство на францускиот тим. Домаќините го завршија натпреварот со серија од 17-2, а Партизан во клучните минути остана без погодок.
Вотерс и Милс беа најефикасни кај Асвел со по 14 поени, а Краудер додаде 13. Кај Партизан најдобар беше Кевариус Хејс со 15 поени, а Ламар Стивенс постигна 13. Лидерот на тимот, Карлик Џонс, беше добро чуван и заврши со само седум поени и четири изгубени топки.
Партизан со овој пораз падна на скор од четири победи и четири порази. Белградскиот тим ќе мора брзо да го врати ритамот за продолжението на сезоната.
Рекорд на Хапоел
Во осмото коло Хапоел Тел Авив во Ботевград го прегази Анадолу Ефес со 118-88. Израелскиот тим постави клупски рекорди по бројот на постигнати поени и погодени тројки, а Антонио Блејкни со 35 поени постави и личен клупски рекорд.
Олимпијакос, без неколку важни играчи, славеше кај Бешикташ со 81-73, а Саша Везенков постигна 16 поени. Жалгирис во Болоња го совлада Виртус со 91-74, а Јонас Валанчјунас заврши со 17 поени и 11 скока.
