Хари Кејн ја освои Златната топка во една од најтесните трки во историјата на наградата. Напаѓачот на Баерн собра 1.055 бода, само 28 повеќе од Килијан Мбапе, откри списанието Франс футбол, кое го доделува признанието, пренесува Стрејтс тајмс.
Кејн беше прв на 40 од вкупно 100 гласачки ливчиња, додека капитенот на Франција и напаѓач на Реал Мадрид, Мбапе, беше прв на 23 ливчиња и заврши со 1.027 бода. Според Екип, ова е четвртата најмала разлика меѓу првите двајца во историјата, а трката беше потесна и од онаа во 2024 година, кога Родри го победи Винисиус Жуниор за 41 бод.
Трет е Ламин Јамал со 881 бод, 174 помалку од Кејн. Младиот Шпанец, кој ова лето со Шпанија стана светски шампион, беше прв на 13 гласачки ливчиња.
Македонскиот глас за Јамал
Меѓу земјите чии новинари го ставија Јамал на првото место е и Македонија, покажува списокот што го објави Гол. Освен македонскиот член на жирито, првото место на Јамал му го дадоа и новинарите од Албанија, Алжир, Буркина Фасо, Зелен Рт, Хондурас, Јордан, Мексико, Велс, Португалија, Швајцарија, Тунис и Турција.
Во првите десет се уште и Родри со 726 бода, Лионел Меси со 612, Хвича Кварацхелија со 541, Усман Дембеле со 418, Ерлинг Холанд со 378, Мишел Олисе со 296 и Фабијан Руис со 201 бод, пишува Ас. Ашраф Хакими, кој во петокот го постигна првиот хет-трик во кариерата, е 13ти со 65 бода.
Кејн е првиот Англичанец со Златната топка по Мајкл Овен во 2001 година и првиот играч на Баерн со ова признание по Карл-Хајнц Румениге во 1981 година. Минатата година Дембеле ја освои наградата со 1.380 бода, дури 321 повеќе од Јамал.
Златната топка ја доделуваат новинари, по еден од секоја од првите 100 земји на ранг-листата на ФИФА кај мажите. Секој гласач избира десет играчи, при што првиот добива 15 бода, вториот 12, третиот 10, а останатите по 8, 7, 5, 4, 3, 2 и 1 бод.
