Милан го доби градското дерби против Интер со 3-1 и му го нанесе првиот сезонски пораз на лидерот и актуелен шампион на Италија. Сите четири гола паднаа во првото полувреме на „Сан Сиро“, а главна фигура беше Диего Мореира со гол и две асистенции, пренесува Би-би-си.
Домаќините поведоа уште во 4тата минута. Мореира се проби по десното крило и прецизно центрираше, а Кристијан Пулишиќ со глава одблизу го погоди долниот агол. Шест минути подоцна, Мореира изведе корнер кон Адријан Рабио, кој од прва го прати топчето во мрежата преку стативата за 2-0, наведува официјалниот портал на Милан.
Интер намали во 22рата минута, кога Алесандро Бастони со глава реализираше по корнерот на Хакан Чалханоглу и продолжението на Мануел Акањи. Гостите потоа извршија силен притисок, но голманот Мајк Мењан ги одбрани ударите на Чалханоглу, Енди Диуф и Петар Сучиќ, а во 33тата минута со одличен рефлекс го спречи и Џед Спенс, кој дебитираше од првата минута во Серија А.
Во 43тата минута Мореира го постави конечниот резултат. Белгиецот изведе слободен удар со левата нога, преку ѕидот, и го совлада Жозеп Мартинез. Второто полувреме помина без голови, а Интер во финишот остана и без пенал, кој судијата го поништи по проверката на ВАР.
Пулишиќ постигна гол во деновите кога потпиша нов петгодишен договор. Тоа му е четврти гол во миланските дербија, а повеќе голови има постигнато само против Лече. Американецот има 45 гола на 142 натпревари за Милан од доаѓањето во 2023 година, пишува Еј-пи.
Милан го доби четвртото последователно дерби, сметајќи го и Купот на Италија, и е без пораз против градскиот ривал на осум натпревари. Интер последната победа над Милан ја оствари во април 2024 година.
Интер, кој пред колото беше на врвот, падна на второто место, зад Лацио, поради полошата гол-разлика, а двата тима имаат по 25 бода. Милан со 21 бод се искачи на четвртото место и ја намали разликата зад градскиот ривал на четири бода.
