Американската пливачка Клер Курзан постави нов светски рекорд во дисциплината 100 метри грбно во краток базен. На американските квалификации за Светското првенство во кратки базени во Вестмонт, Илиноис, таа победи со време од 53,92 секунди и стана првата жена во историјата што ја испливала оваа дисциплина за помалку од 54 секунди, пренесува Свимсвам.
Курзан го собори рекордот од 54,02 секунди на својата сонародничка Реган Смит, која тоа време го испливала двапати, во 2024 година на Светското првенство во кратки базени и во 2025 година на Светскиот куп, токму во Вестмонт.
Финалето се одржа во петокот во нататориумот ФМЦ во Вестмонт и донесе вистинско изненадување. Втора беше Катарина Беркоф со лично најдобро време од 54,72 секунди, со кое стана четврта најбрза пливачка во историјата на дисциплината, додека Смит, која важеше за фаворит, заврши трета со 54,82 секунди и нема да настапи во оваа дисциплина на Светското првенство.
Дваесет и двегодишната студентка на Универзитетот во Вирџинија првите 50 метри ги исплива за 26,36 секунди, а вторите за 27,56 секунди, пишува Свиминг ворлд.
Ова е првиот поединечен светски рекорд во кариерата на Курзан. Пред финалето нејзиното најдобро време беше 54,94 секунди. Курзан досега има освоено 13 медали на светски првенства во кратки базени.
Со победата таа обезбеди место во репрезентацијата на САД за Светското првенство во кратки базени, кое ќе се одржи од 1 до 6 декември во Пекинг.
Рекорд и за Алекси
На истиот натпревар светски рекорд постави и Џек Алекси во дисциплината 100 метри слободно. Американецот исплива за 44,64 секунди и го собори рекордот од 44,84 секунди, кој го делеа Австралиецот Кајл Чалмерс и Русинот Егор Корнев.
