Реал Мадрид ја продолжи победничката серија. Тимот на Жозе Мурињо во 11тото коло од Ла Лига го совлада Расинг Сантандер со 3-0 на „Ел Сардинеро“ и стигна до шестата последователна победа во сите натпреварувања, пренесува официјалниот портал на Реал Мадрид.
Сите голови паднаа во првото полувреме. Во 11тата минута Килијан Мбапе го реализираше пеналот што самиот го изнуди по контактот со Лукас Прати. Тоа беше неговиот 12ти гол во првенството сезонава.
Одлуката на судијата Хосе Луис Мунуера Монтеро предизвика протести кај домаќините, а ВАР не интервенираше. Поранешниот судија Итурралде Гонзалез, кој ги анализира судиските одлуки, оцени дека не станувало збор за пенал, наведува Ас.
Во 21вата минута Џуд Белингам, по одличното додавање на Арда Гулер, изби сам пред голот, го заобиколи голманот Јулен Агиресабала и го постигна вториот гол. Тоа беше неговиот 50ти гол во дресот на Реал. Резултатот го заокружи Јан Диоманде во 36тата минута со силен волеј во горниот агол од работ на казнениот простор.
Расинг беше поопасен во второто полувреме, а во 71вата минута судијата досуди пенал за домаќините поради играње со рака на Орелиен Чуамени. По проверката на мониторот, одлуката беше поништена. Мбапе подоцна ја погоди стативата, а голот на Белингам во судиското продолжение беше поништен поради офсајд.
„Фановите овде протестираат за сè. Ова е стадион што навистина ми се допаѓа, а ги сакам и навивачите. Тие имаат посебен карактер и доаѓаат за да притискаат и да бидат дел од натпреварот“, изјави Мурињо по натпреварот, коментирајќи ги спорните ситуации. Тој додаде дека, според него, немало пенал ниту за Реал ниту за Расинг.
Реал е трет на табелата во Ла Лига, со три бода помалку од лидерот Барселона, пренесува ТНТ спортс.
