Првата тенисерка на светот, Елена Рибакина, се повлече од завршниот турнир на ВТА во Индијан Велс поради вирусно заболување. Казахстанката требаше да ја брани титулата освоена минатата година, но само еден ден пред почетокот објави дека нема да настапи.
Нејзиното место во Групата 1 го презема Марта Костјук. Украинката ќе го отвори турнирот во недела против Линда Носкова, а во групата ја очекуваат и Коко Гоф и Џесика Пегула, објави ВТА.
„Многу сум тажна што морам да ги известам сите мои навивачи дека за жал се повлекувам од завршниот турнир оваа година. Имав неверојатна сезона, но моето тело едноставно не е физички подготвено за натпреварување“, изјави Рибакина.
„Ќе одморам и ќе закрепнувам дома и ќе се подготвам за сезоната 2027. Завршниот турнир е многу посебен и им посакувам на сите среќа оваа недела. Едвај чекам да се вратам во Индијан Велс во март“, додаде 27-годишната тенисерка.
Рибакина минатата година во Ријад стигна до титулата без пораз, иако на турнирот настапи како последна квалификувана тенисерка. Оваа сезона прва го обезбеди пласманот, откако на УС Опен го освои третиот гренд слем трофеј во кариерата и се искачи на првото место на ранг-листата.
Сезоната ја завршува со учинок од 54 победи и 14 порази и со четири титули, на Австралија Опен, во Штутгарт, на УС Опен и во Нингбо. Првото место на крајот од годината го обезбеди уште во октомври, за време на турнирот во Токио.
Во финалето на УС Опен ја совлада Арина Сабаленка и ја прекина нејзината серија од 99 недели на врвот. Годинава беше финалистка и во Индијан Велс и во Торонто, а на гренд слем турнирите забележа 17 победи во 19 натпревари, пренесува Би-Би-Си.
Со 438 асови Рибакина беше најдобра на Турнејата, со дури 140 повеќе од второпласираната Сабаленка. Имаше и 1775 винери и десет победи против тенисерки од првите десет. Без неа, во Индијан Велс никој нема да може да го повтори успехот на Серена Вилијамс, последната тенисерка која ја одбрани титулата во 2014 година.
