Кошаркарите на Париз го совладаа Фенербахче со 111-109 по продолжение во 11тото коло од Евролигата. Победата ја донесе Надир Хифи, кој го постигна победничкиот кош во последната секунда од продолжението, пренесува Еврохупс.
Францускиот тим во текот на натпреварот имаше предност од 15 поени, но гостите се вратија, а Вејд Болдвин го постигна кошот со кој средбата замина во продолжение. Пред одлучувачкиот шут, Хифи имаше само три погодоци од 17 обиди од игра, но во клучниот момент не згреши.
Најефикасен кај Париз беше Френк Нтилкина со 22 поени, Ти Џеј Ворен додаде 19, а Џаред Роден 13 поени. Кај Фенербахче, Тејлен Хортон-Такер постави личен рекорд со 32 поени и 10 скока, Болдвин заврши со 22 поени и четири асистенции, а Маркус Бингам имаше 14 поени и шест скока, објави Фенербахче.
Во другиот натпревар од средата, Партизан во Белград ја совлада Басконија со 80-66. Домаќините пред последната четвртина водеа со 65-60, а потоа на гостите им дозволија да постигнат само шест поени во последните десет минути. Алесандро Пајола со две тројки во завршницата го реши натпреварот.
Тоње Џекири, кој се врати по повредата токму против својот поранешен клуб, заврши со 17 поени и шест скока за помалку од 21 минута. Карлик Џонс додаде 16 поени и шест асистенции, Никола Танасковиќ 14, а Пајола девет поени. Кај Басконија, Крис Дуарте постигна 15, а поранешниот играч на Партизан, Родионс Куруц, 10 поени.
Партизан играше без Ламар Стивенс, а новото засилување Крис Силва го следеше натпреварот од трибините пред лекарските прегледи закажани за четврток.
По ова коло, Фенербахче е седми со учинок 7-4, Партизан е на 11тото место со 6-5, Париз е 12ти со 5-6, а Басконија е последна со само една победа од 11 натпревари. Колото продолжува во четврток, кога, меѓу другото, Реал Мадрид игра со Црвена ѕвезда, Олимпијакос со Дубаи, а Макаби и Хапоел го играат дербито во Тел Авив.
