Саша Везенков е новиот најдобар стрелец во историјата на Олимпијакос во Евролигата. Крилниот центар на грчкиот шампион во победата над Дубаи со 101-72 во 11тото коло постигна 20 поени и стигна до 3.571 поен во дресот на клубот од Пиреја, објави официјалниот сајт на Евролигата.
Со тоа Везенков го престигна легендарниот Василис Спанулис, кој сега е втор со 3.552 поени. Според БГНЕС, рекордот го собори уште со првиот кош на натпреварот, а Спанулис, кој денес е селектор на Грција, го следеше натпреварот од трибините.
Бугарскиот репрезентативец уште во првата четвртина постигна 12 поени, а натпреварот го заврши со 6 од 6 шута за два поени, 2 од 4 за три поени и 2 од 2 слободни фрлања. Ова му беше трет натпревар по ред со најмалку 20 поени, по 27 против Црвена звезда и 23 против Олимпија Милано.
„Пред две-три недели ме прашувавте за Георгиос Принтезис, а сега моето име треба да стои покрај Василис, еден од најголемите, за мене и најголемиот во историјата на Евролигата. Тоа е нешто посебно. Најважни се екипните трофеи и тоа ќе го повторувам до крајот“, изјави Везенков за Јурохупс.
Тој се пошегува и на сметка на Спанулис, кој сега е тренер на Арис, со кој Олимпијакос игра во грчкото првенство викендов. „Знам дека Василис е среќен поради мене. Ќе биде среќен до недела попладне, а потоа некое време нема да зборуваме“, рече Везенков.
На листата на најдобри стрелци на Олимпијакос во Евролигата трет е Принтезис со 3.380 поени, четврти е Костас Папаниколау со 2.730, а петти е Никола Милутинов со 1.931 поен. Везенков го оствари ова достигнување со три сезони помалку во клубот од Спанулис.
Везенков ја игра 11тата сезона во Евролигата, првите три во Барселона, а останатите во Олимпијакос. Двапати беше прогласен за најкорисен играч, четирипати беше во идеалната петорка, а во 2026 година ја освои Евролигата со грчкиот клуб. Вкупно во натпреварувањето има 3.902 поени.
Олимпијакос по оваа победа има учинок од осум победи и три порази. Следниот предизвик за Везенков е рекордот за најмногу поени за еден клуб во историјата на Евролигата, кој го држи Серхио Љуљ со 4.355 поени за Реал Мадрид, а пред него е и Хуан Карлос Наваро со 4.152 поени за Барселона.
