Првиот тенисер на светот, Александар Зверев, и вториот носител, Карлос Алкараз, ги дознаа ривалите во групната фаза на завршниот турнир на АТП во Торино. Ждрепката беше извлечена во четвртокот попладне, а натпреварите во „Иналпи арена“ ќе се играат од 15 до 22 ноември, пренесува АТП.
Зверев е во Групата Џон Мекенро, заедно со Бен Шелтон, Артур Фис и Рафаел Ходар. Германецот е двократен шампион на турнирот, со титули освоени во 2018 и 2021 година.
Алкараз ја предводи Групата Иван Лендл, во која се и Данил Медведев, Флавио Коболи и Френсис Тијафо. Шпанецот, кој има само 23 години, на завршниот турнир настапува по четврти пат, а најдобар резултат му е минатогодишното финале.
Алкараз пристигнува во Торино во одлична форма. По враќањето од повредата на Отвореното првенство на САД, ги освои титулите во Париз, Виена и Токио.
На турнирот нема да игра Јаник Синер, кој е повреден, па италијанските навивачи ќе навиваат за Коболи. Тој, како и Фис, Тијафо и Ходар, дебитира на завршниот турнир, додека Шелтон настапува по втор пат, а Медведев е шампион од 2020 година, пишува АТП.
Извлечени се и групите во конкуренцијата на двојки. Бранителите на титулата и првите носители, Хари Хелиовара и Хенри Патен, се во Групата Тод Вудбриџ, заедно со Марсело Аревало и Мате Павиќ, Тео Арибаже и Албано Оливети, како и Орландо Луз и Рафаел Матос.
Во Групата Марк Вудфорд се Кристијан Харисон и Нил Скупски, Марсел Гранолерс и Орасио Себаљос, Симоне Болели и Андреа Вавасори, како и Кевин Кравиц и Тим Пуц.
Натпреварите во Торино почнуваат во недела, а од секоја група по двајца тенисери ќе се пласираат во полуфиналето. Финалето ќе се одигра на 22 ноември.
