Англија вечерва од 20:45 часот гостува кај светскиот шампион Шпанија на стадионот „Метрополитано“ во Мадрид, во последниот натпревар од Групата А3 во Лигата на нациите. Двете репрезентации веќе обезбедија пласман во четвртфиналето, а Англичаните со победа ќе ја престигнат Шпанија и ќе го освојат првото место, пренесува Англиската фудбалска федерација.
Шпанија го доби првиот меѓусебен дуел на „Вембли“ во септември со 3-2. Оттогаш Англија забележа четири последователни победи и постигна 14 гола.
„Ова е најголемиот тест во светскиот фудбал за репрезентациите во моментов, затоа што Шпанија изгледа непобедливо. Имаат многу силен идентитет и многу силен натпреварувачки менталитет. Се обидуваме да ги победиме и подготвени сме за тоа. Мислам дека сме во многу добар момент“, изјави селекторот Томас Тухел.
Тухел ќе може да избира од целиот состав, бидејќи Езри Конса и Џед Спенс се повторно на располагање. Германецот потврди дека на голот ќе стои Џејмс Трафорд, бидејќи и во оваа пауза за репрезентациите натпреварите ги дели меѓу двајцата голмани. Џордан Пикфорд, кој има 94 настапи за Англија, го чуваше голот во победата над Хрватска на „Вембли“, потсетува Скај спортс.
„Мислам дека утрешниот натпревар ќе го извлече најдоброто од нас. Како играчи, ова се натпреварите што сакате да ги играте, против најдобрите тимови и најдобрите играчи. Кога ги имате Хари Кејн, Ентони Гордон, Џуд Белингем и Морган Роџерс во ваква форма, потребна ви е само една вечер за да полетате“, рече Деклан Рајс, кој го пропушти септемврискиот натпревар, објави Англиската фудбалска федерација.
Шпанија во четвртокот, без повредениот Ламине Јамал и уште неколку стандардни играчи, тешко дојде до победа од 2-0 над Чешка. Јамал, кој со четири гола е најдобар стрелец на Шпанците во ова издание, остана во Барселона на терапија поради проблеми со десното колено, но сега е подготвен и се врати во репрезентацијата. Селекторот Луис де ла Фуенте може да смета и на Алекс Баена, кој има два гола и две асистенции на пет натпревари.
Кејн во ова издание има седум гола, а во победата над Хрватска стана играчот со најмногу настапи во историјата на машката репрезентација на Англија. Англичаните последната гостинска победа над Шпанија ја остварија во 2018 година, кога славеа со 3-2 во Севиља, наведува УЕФА.
Во исто време, во Групата А3 се игра и натпреварот меѓу Хрватска и Чешка во Осиек. На Хрватите им е доволно реми за да го обезбедат третото место, додека Чешка е без бод по пет кола.
