Клубовите од Премиер лигата изгласаа лигата да ги покрива правните трошоци на петте членови на нејзиниот одбор на директори доколку некој од спонзорите на Манчестер Сити ги тужи, објави Би-би-си.
Клубовите се состанаа во Лондон во четвртокот, првпат откако независна комисија во септември го прогласи Сити за виновен за низа прекршувања на финансиските правила на лигата. Сити поднесе жалба и тврди дека е невин, а казната сè уште не е одредена.
Спонзорите на клубот, Етихад и Етисалат, изјавија дека размислуваат да преземат правни чекори против Премиер лигата.
Досега, според статутот на лигата, директорите имаа финансиска заштита доколку добијат судски спор покренат од трета страна, но не и ако го изгубат. Правилата сега ќе бидат изменети, со што правната заштита ќе се прошири на извршниот директор Ричард Мастерс, претседателката Алисон Британ и уште тројца неизвршни директори.
Против предлогот гласаа само Манчестер Сити и Нотингем Форест, додека останатите 18 клубови го поддржаа. Поради колективната одговорност, сите клубови сега се обврзани да учествуваат во покривањето на правните трошоци, кои би можеле да достигнат стотици милиони фунти. Тоа отвора можност Сити финансиски да биде погоден од тужбите на сопствените спонзори.
Според Би-би-си, финансискиот директор на Сити, Инго Банк, на состанокот ја прашал Британ дали предлогот е директна последица на заканите со тужби од Етихад и Етисалат, но таа одговорила дека не може да коментира. Форест одби да коментира, а неговото противење, според медиумот, било од процедурални причини, а не поради поддршка за Сити.
Независната комисија во септември утврди дека Сити во период од девет години вештачки ги зголемувал приходите за повеќе од 830 милиони фунти преку фиктивни спонзорски договори со кои се прикривало финансирањето од сопствениците. Мастерс тогаш изјави дека Сити „систематски ги кршел правилата на Премиер лигата речиси една деценија“.
Етихад во октомври соопшти дека „категорично ги отфрла“ сите наоди што укажуваат дека авиокомпанијата била вклучена во несоодветни комерцијални договори, додека Етисалат овој месец ја нарече одлуката на лигата „целосно лажна и клеветничка“.
















