Алкалоид го победи Еурофарм Пелистер со 30-28 (14-10) во дербито од 11тото коло на македонската ракометна Суперлига, одиграно во четвртокот во салата „Автокоманда“ во Скопје, објави РК Алкалоид.
Гостите од Битола, предводени од капитенот Филип Кузмановски, поведоа со 3-1, но домаќините одговорија со серија од 4-0. Се играше изедначено сè до 10-9, кога Алкалоид постигна четири гола по ред и на одмор замина со предност од 14-10.
На почетокот на второто полувреме тимот на Кирил Лазаров стигна до најголемата предност од шест гола (19-13, а потоа и 20-14). Пелистер двапати ја намали разликата на три гола (21-18 и 22-19), но не успеа да направи целосен пресврт.
Најефикасен кај Алкалоид беше Никола Костески со седум гола, а голманот Марко Кизиќ имаше десет одбрани. Домаќините ги реализираа сите шест седмерци. Кај Пелистер, Кузмановски постигна седум гола, Хакбарт шест, а голманот Никола Митревски имаше 11 одбрани и еден гол.
Според клубот, победата има двојна вредност бидејќи носи бодови и во Суперлигата и во Регионалната лига. Со неа Алкалоид се искачи на третото место на табелата со 18 бода, а Пелистер падна на четвртото со 17 бода. Ова е втор пораз на тимот на Лино Червар во првенството сезонава.
„Мислам дека одигравме екстра квалитетен натпревар, и ние и Пелистер. Сакам да им честитам за фер-плеј играта. Се играше тежок и цврст македонски ракомет. Ја одигравме нашата најквалитетна партија сезонава, конечно во комплетен состав, иако сè уште не сме во најдобра физичка кондиција“, изјави Лазаров за македонските медиуми.
Тренерот на Алкалоид додаде дека неговиот тим мора да научи подобро да ги завршува натпреварите: „Свесен сум дека добиен натпревар не смееме повторно да го доведеме во неизвесна завршница“. За Червар рече: „Никогаш не можете да го надмудрите Лино. Многупати сум се консултирал со него за различни работи поврзани со националниот тим, а неговите совети секогаш се добредојдени“.
Червар порача дека на неговите играчи им недостигаше свежина, само два дена по победата во Европската лига. „Не бевме рекуперирани, немавме доволно време. Имавме тежок натпревар пред два дена, имаше еуфорија, малку славење и веднаш нов тежок натпревар. Немавме доволно свежина во играта и тоа се забележуваше особено кај лидерите во екипата“, рече Червар.
Алкалоид сега се подготвува за европскиот натпревар против словенечкото Горење Велење.
















