Кој ќе победи во Beer Pong - Лига на Шампиони! ↓↓↓
На Хари Кејн му остануваат уште речиси две години од договорот со Баерн Минхен, каде што тој и неговото семејство се среќни, но идејата за враќање во Премиер лигата сè уште е присутна. Според извештаи од Германија, капитенот на англиската репрезентација би можел да се врати во татковината веќе следното лето благодарение на тајната клаузула во неговиот договор, пишува Mirror.
Кејн (32) има договор со Баерн до јуни 2027 година, но неговата иднина во клубот сега е доведена во прашање. Германскиот весник Bild наведува дека во неговиот договор постои механизам што му овозможува да си замине. Според тие наводи, Кејн може да го напушти Баерн за околу 67 милиони евра следното лето, но само под услов клубот да биде информиран пред крајот на зимскиот трансфер период во јануари.
Сам Кејн не остава впечаток дека настојува да си замине. “Животот е добар. Досега беше одлично искуство, уживам тука, семејството ужива, па да, со нетрпение ја очекувам наредната сезона”, изјави тој во текот на летото.
На крајот од минатата сезона додаде: “Мислам дека во фудбалот, во животот, никогаш не знаеш што те чека зад аголот. Но, што се однесува до мене, многу сум среќен тука во Минхен. Моето семејство се смести. Моите деца уживаат тука на училиште. Ова е мојот живот овде во догледна иднина.”
“Го сакам тренерот. Го сакам тимот тука. Мислам дека само што започнавме, гледаме успех, навистина успешен период за овој клуб, и сакам да бидам голем дел од тоа. Кој знае колку години, но сигурно сакам да останам тука некое време”, заврши Кејн.
