Барселона ќе мора да се снаоѓа без Чави Еспарт во следните речиси два месеца. Каталонскиот клуб во понеделникот потврди дека 19-годишниот бек ќе отсуствува „околу седум недели“ поради повреда на десниот глужд, која ја доживеа во неделата на Ел Класико против Реал Мадрид.
„Прегледите потврдија дека Чави Еспарт има повреда на синдесмозата на десниот глужд, како последица на судир со противнички играч на натпреварот против Реал Мадрид“, се вели во медицинскиот извештај на клубот.
Еспарт беше еден од најдобрите играчи на Барселона на „Камп Ноу“, каде што успешно го запираше Диоманде, но во 30тата минута мораше да го напушти теренот, а на негово место влезе Алехандро Балде. Според Ла Вангуардија, клубот во соопштението индиректно го посочи Оријлен Чуамени, кој со својот старт го погоди Еспарт во десната нога. Играчите на Реал сметаа дека немало прекршок, додека Барселона бараше жолт картон, кој судијата Мартинес Мунуера не го покажа.
Реал Мадрид го доби дербито со 2-1 и ѝ го нанесе на Барселона првиот пораз во првенството оваа сезона. Тимот на Ханси Флик и понатаму е на врвот, со два бода предност пред Атлетико Мадрид и три пред Реал на Жозе Моурињо, пренесува Скор.
Еспарт оваа сезона се наметна како едно од најголемите откритија во тимот. Младиот фудбалер од клупската школа одигра девет натпревари, постигна два гола и забележа две асистенции, а беше стартер и против Париз Сен Жермен, кога се запиша меѓу стрелците во Париз.
Поради повредата ќе го пропушти гостувањето кај Атлетико Мадрид на 8 ноември, како и натпреварите во Лигата на шампионите против Астон Вила, Сабах и Манчестер Сити. Со оглед на тоа што Барселона последниот натпревар во оваа година го игра на 20 декември, можно е Еспарт да не заигра до крајот на 2026 година, пишува ЕСПН.
Флик сега има сериозен проблем во одбраната. Барселона веќе е без Андреас Кристенсен, Жил Кунде и Ерик Гарсија, а повреден е и Дани Олмо. Единствените здрави бранители во составот се Жоао Кансело, Балде, Пау Кубарси и Жерар Мартин.
