Барселона го доби големото дерби на „Метрополитано“ и со пресврт го совлада Атлетико Мадрид со 2-1. Двата гола за каталонскиот тим ги постигна Фермин Лопез, кој со тоа го одбележа својот стоти натпревар во шпанското првенство.
Атлетико подобро го почна натпреварот и поведе во 10тата минута, кога Џулијано Симеоне од близина ја заврши акцијата по додавањето на Хулијан Алварес. Барселона долго немаше решение за збиената одбрана на домаќините.
Изедначувањето стигна во 45тата минута. По продорот на Педри, топката стигна до Фермин, кој со левата нога шутираше покрај Јан Облак за 1-1 на полувремето.
На почетокот на второто полувреме Алварес имаше шанса повторно да го врати водството на Атлетико, но ја испрати топката над голот. На паузата Ханзи Флик го воведе Френки де Јонг наместо Брајан Фарињас.
Победничкиот гол падна во 66тата минута. Ламине Јамал со прецизно додавање го проигра Фермин во казнениот простор, а 23-годишниот играч овојпат со десната нога го совлада Облак, објави Барселона.
„Ламине Јамал и јас многу добро се разбираме. Половина од голот е негов“, изјави Фермин по натпреварот за Барселона.
Барселона со победата остана на првото место, со три бода предност пред Реал Мадрид, кој во саботата ја совлада Валенсија со 3-0. Атлетико е трет, со пет бода заостанување зад лидерот.
Натпреварот го следеа 69.788 гледачи. Шпанското првенство сега паузира поради репрезентативните натпревари.
