Хуберт Хуркач се врати со силен сервис на турнирот од серијата Мастерс 1000 во Шангај, кој го освои во 2023 година. Полскиот тенисер во првото коло со 19 аса го совлада Австралиецот Џејмс Дакворт со 6-3, 7-6(4) за 81 минута и си обезбеди дуел со Новак Ѓоковиќ во второто коло.
Ѓоковиќ, рекордер со четири титули во Шангај, пристигнува во одлична форма по триумфот во Пекинг во вторникот, кој му донесе 102ра титула во кариерата. Хуркач досега ги изгуби сите осум меѓусебни дуели со српскиот тенисер.
„Ќе биде забавен предизвик. На мојата листа е да одиграм добар тенис против него и да стигнам до победа. Тој веќе има неколку победи против мене. Морам добро да сервирам, да играм добро од основната линија и добро да враќам. Повторно ја освои титулата во Пекинг. Секогаш е задоволство да се дели теренот со Новак, толку голем шампион“, изјави Хуркач.
Поранешниот шести тенисер на светот е во подем на азиската турнеја. Стигна до финалето во Ченгду, а потоа и до полуфиналето во Пекинг, каде што се откажа во вториот сет против Алекс де Минор поради проблем со адукторот.
„Дефинитивно се чувствувам подобро. Беше малку несреќно во Пекинг, имав проблем со адукторот, но сега е подобро. Работев многу на опоравувањето за да ја вратам енергијата за овој турнир, затоа што навистина сакам да играм тука“, додаде 29-годишниот Полјак.
Во првиот меч од денешната програма на Централниот терен, Стефанос Циципас го совлада квалификантот Кимер Копејанс со 6-3, 7-5. Грчкиот тенисер сега има учинок од шест победи од шест натпревари во првото коло во Шангај, а според статистиката на АТП, изгуби само четири од 19 поени на својот втор сервис, објави ATP Tour.
„Чувствувам дека дел од мојот најдобар тенис дојде кога играм прв на програмата“, рече Циципас, потсетувајќи на победата против Артур Фис во првото коло на УС Опен, кој исто така се играше рано во текот на денот.
Циципас во второто коло ќе игра против 18тиот носител Лучано Дардери, кого го победи во единствениот меѓусебен дуел, на трева во Хале минатата година. Со оваа победа поранешниот трет тенисер на светот напредува пет места, до 38мото место на АТП ранг-листата во живо.
Во другите мечеви од првото коло, квалификантот Павел Котов го совлада Талон Гриекспор со 6-4, 7-6(4), а Шпанецот Жауме Мунар беше подобар од Американецот Џенсон Бруксби со 7-5, 6-4.
