Синер наводно оди во САД на нов преглед на коленото

Јаник Синер на Ролан Гарос
Фото: Like tears in rain / Wikimedia Commons (CC BY-SA 4.0)

Јаник Синер наводно се подготвува да отпатува во САД на нов медицински преглед поради проблемите со десното колено, пишува италијанскиот неделник Ванити фер, а пренесува Гацета дело спорт.

Италијанецот не е на терен од јули, кога го освои Вимблдон. Според написот, по прегледите во Италија, Синер решил да побара уште едно мислење од друг специјалист.

Досега за ублажување на болката во коленото се применуваше конзервативна терапија, а за време на евентуалниот престој во САД Синер би се консултирал со нов специјалист.

Информациите засега не се официјално потврдени. Според Република, Синер би требало да се консултира со американски специјалисти по ортопедија, а неговото учество на Отвореното првенство на Австралија во јануари е сè понеизвесно. Италијанскиот дневен весник оценува дека тенисерот води вистинска трка со времето за да стигне до Мелбурн.

Според досегашните планови, поранешниот прв тенисер на светот требаше да се врати на егзибицискиот турнир во Ријад, од 27 до 30 декември, а потоа да настапи на првиот гренд слем турнир во сезоната, во Мелбурн.

„Сакам да играм уште десет години“, изјави Синер неодамна на настан организиран од неговиот спонзор. Во изминатите денови беше официјално потврдено и дека Магнус Норман ќе го замени Дарен Кахил во стручниот штаб, во кој е и тренерот Симоне Вањоци.

Поради повредата, Синер го пропушти и завршниот турнир во Торино, на кој минатата година го освои трофејот со победата над Карлос Алкараз во финалето.

Минатата недела легендата на мотоциклизмот Валентино Роси откри дека се сретнал со Синер и дека тенисерот му се доверил дека сè уште има проблеми со десното колено.