Манчестер Сити вечерва во 21 часот гостува кај РБ Лајпциг во четвртото коло од Лигата на шампионите, а тренерот Енцо Мареска пред натпреварот порача дека неговиот тим мора паметно да ги распореди силите во текот на долгата сезона.
„Ова не е кратка трка, не е спринт, туку маратон. Мораме да размислуваме за 65 натпревари. Многу е важно да победуваме на начинот на кој се обидуваме, но исто толку е важно во февруари или март, кога работите стануваат возбудливи, сите да бидат достапни и во форма“, изјави Италијанецот, пренесува Би-Би-Си.
Мареска беше прашан за ротацијата на Фил Фоден, Илиман Нијаје и Рајан Шерки. „Фил го гледам од ден на ден сè подобар. Имаме многу натпревари и 20 сениорски играчи, сите многу добри. Добро е да има конкуренција меѓу нив“, рече тренерот на Сити.
Холанд без гол против Брајтон
Сити е втор во Премиер лигата и 11ти во Лигата на шампионите, но доаѓа по два последователни порази во првенството. Домашниот пораз од Брајтон во саботата ја прекина серијата на Ерлинг Холанд, кој претходно постигнуваше гол на девет последователни натпревари, на кои ја затресе мрежата 13 пати.
„Важно е на секој натпревар да создаваме шанси. Знаете дека тој е секогаш тука, но не можеме сè да очекуваме од Ерлинг. Кога е на теренот, сме среќни, но и другите мора да постигнуваат голови“, порача Мареска.
Баумгартнер се враќа во стартниот состав
Тренерот на Лајпциг, Мартин Демикелис, откри само едно име од својот стартен состав. „Мојот пријател Енцо Мареска сакаше да ја дознае мојата постава, но не можам да откријам повеќе од Баумгартнер“, рече Аргентинецот, пренесува Ар-Би Лајв.
Кристоф Баумгартнер, кој во Мадрид, при поразот од Реал со 1-4, влезе од клупата и веднаш забележа асистенција, верува дека германскиот тим може да му парира на Сити. „Мора да бидеме храбри и прецизни во играта. Ако ги покажеме тие работи на теренот, можеме да се спротивставиме и на Сити“, изјави австрискиот репрезентативец.
Лајпциг може да смета на речиси комплетен состав, а единствено левиот бек Макс Финкгрефе најверојатно ќе отсуствува поради проблем со бутот. Германскиот тим има само три бода во лигашката фаза, па победата вечерва му е неопходна за да остане во борбата за понатамошен пласман.
