Рафаел Надал се подготвува за нова улога во светот на спортот. Управниот одбор на Реал Мадрид во средата одлучи да им предложи на делегатите на клубот да го ратификуваат назначувањето на најтрофејниот шпански тенисер за нов член на управата, објави Реал Мадрид.
Предлогот бил едногласно усвоен од управата, а за него ќе се гласа на вонредното генерално собрание во сабота, 21 ноември, во кошаркарската сала во спортскиот центар на клубот.
„За Реал Мадрид и за сите мадридисти е голема чест личност со неговиот спортски и човечки углед, која е референца во шпанскиот и светскиот спорт, да се приклучи на нашиот управен одбор и да придонесе за сегашноста и иднината на клубот“, се вели во соопштението.
Надал е почесен член на Реал Мадрид и има членска карта со број 67.778. Тој отсекогаш јавно се изјаснуваше како навивач на „кралскиот клуб“.
Клубот во соопштението потсети на неговите 92 титули, меѓу кои 22 гренд слем трофеи, двата олимписки златни медали и петте титули во Дејвис купот со Шпанија.
Според Ел Економиста, на Надал засега не му е доделена посебна функција, туку предлогот се однесува на членство во управниот одбор.
Двојно собрание на 21 ноември
Пред вонредното собрание, истиот ден ќе се одржи и редовното собрание на делегатите, на кое ќе се гласа за завршната сметка, буџетот и членарините, објави Реал Мадрид. Ратификацијата на назначувањето на Надал е единствената точка на дневниот ред на вонредното собрание.
Шпанскиот тенисер ја заврши професионалната кариера во ноември 2024 година, на финалниот турнир на Дејвис купот во Малага.
