Баерн Минхен остана без победа на гостувањето кај Аугсбург, а натпреварот од петтото коло во Бундеслигата ќе остане запаметен по историскиот погодок на Робин Фелхауер. Натпреварот заврши 2-2, по драматично второ полувреме во кое на гостите им беа поништени повеќе голови.
Фелхауер ја затресе мрежата по само осум секунди игра, што е најбрзиот гол во 63-годишната историја на германското првенство. Веднаш по почетниот удар на Баерн, топката беше вратена кон Мануел Нојер, а искусниот голман се обиде да го префрли противникот. Сепак, Фелхауер му ја одзеде топката, го заобиколи и ја смести во празната мрежа.
Со тоа 28-годишниот играч на Аугсбург го собори рекордот од девет секунди, кој заеднички го држеа Кевин Воланд и Карим Белараби. Интересно, и Воланд својот рекорден гол во 2015 година го постигна токму против Нојер и Баерн.
По шокот, Баерн целосно ја презеде иницијативата, но домашните добро се бранеа и полувремето заврши со резултат 1-0. Хари Кејн имаше неколку шанси, а пред паузата неговиот удар заврши во пречката.
Во второто полувреме на гостите најпрвин им беше поништен гол поради офсајд, по проверка со ВАР, а потоа Исмаел Саибари го постигна изедначувачкиот погодок. Аугсбург повторно поведе по брз контранапад, кога Нојер го одби ударот на Бракелман, а Родриго Рибеиро одблизу ја турна топката во мрежата.
Тимот на Венсан Компани продолжи да напаѓа. Головите на Серж Гнабри и Луис Дијаз беа поништени поради офсајд, а изедначувањето на крајот го донесе Натаниел Браун по одлична асистенција на Кејн.
Драмата не заврши тука. Во последната акција на натпреварот Мајкл Олисе ја затресе мрежата за победа на Баерн, но и тој погодок беше поништен бидејќи Гнабри беше во офсајд.
Баерн на претходните 47 првенствени натпревари загуби само еднаш, токму од Аугсбург во јануари во Минхен. Повеќе за рекордниот погодок на ESPN и Bild.
