Кристал Палас е подготвен да го смени менаџерот Пјер Саж, само пет месеци откако Французинот ја презеде екипата. Според Гардијан, одлуката се очекува во понеделник, а клубот веќе го започнал процесот на барање наследник.
Поразот од Ливерпул со 3-1 на „Селхерст Парк“ во неделата беше четврти последователен пораз во првенството и го спушти Палас на последното место на табелата во Премиер лигата, првпат од декември 2017 година.
Тимот на Саж има само две победи во првите десет кола и седум освоени бода, а со 24 примени гола Палас ја има најслабата одбрана во лигата. Притисокот врз тренерот расте уште од поразот од Брајтон со 5-0 минатиот месец.
Раководството на клубот одржало внатрешни разговори за иднината на Саж и за можниот наследник, пишува Би-Би-Си. Како главен кандидат се споменува Томас Франк, поранешниот тренер на Брентфорд и Тотенхем, кој разговарал со Палас уште во текот на летото.
Поддршка во клубот има и Шон Дајч, поранешниот тренер на Нотингем Форест, а како можна опција се наведува и Витор Переира. И Франк и Дајч се без ангажман и би можеле веднаш да почнат со работа.
Саж пристигна во средината на јуни како замена за Оливер Гласнер и потпиша тригодишен договор, откако со Ланс го освои Купот на Франција и се пласира во Лигата на шампионите. Палас во меѓувреме ги загуби двајцата први штопери, Марк Геји, кој во јануари замина во Манчестер Сити, и Максанс Лакроа, кој во текот на летото премина во Челси.
Французинот по натпреварот со Ливерпул тврдеше дека е фокусиран на подобрување на тимот, а не на сопствената позиција. На прашањето дали очекува да остане на клупата и по репрезентативната пауза, одговори: „Подобро од вас, мислам“, пренесува Стандард.
Доколку се потврди отказот, Саж ќе биде првиот тренер во Премиер лигата кој ќе ја загуби работата оваа сезона, по само 16 натпревари на клупата на лондонскиот клуб.
