Кошаркарите на Работнички ја запишаа шестата победа во исто толку натпревари во македонската Суперлига, откако во „Градски парк“ го совладаа Кожув со 83-80 по драматична завршница.
Тимот на Владимир Мирковски мораше многу да се помачи против гостите од Гевгелија. Кожув подобро го почна натпреварот и поведе со 7-2, но Работнички ја заврши првата четвртина со предност од 28-25. На полувремето домаќините имаа минимално водство од 44-43.
Гостите ја презедоа иницијативата во третата четвртина и во последниот период влегоа со водство од 64-62. Неизвесноста траеше до самиот крај.
При резултат 78-78, Кожув имаше напад за водство, но Армстронг погреши при додавањето. Робев ја украде топката и постигна кош од контранапад. Бојчев потоа не погоди за три поени, а Говенс со две слободни фрлања стави точка на натпреварот.
Најзаслужен за победата беше Роберт Рикиќ со 27 поени и седум скока. Говенс заврши со 10 поени и 10 асистенции, а Ефремовски додаде 13 поени. Кај Кожув најефикасен беше Армстронг со 20 поени, а Симиќ постигна 17.
Шампионот МЗТ Скопје Аеродром го доби градското дерби на гостувањето кај Скопје со 79-60. Најефикасен кај победникот беше Емир Крајиниќ со 20 поени и осум скока, а кај Скопје се истакна Камерон Џонс со 18 поени.
Штип го изненади Пелистер во Битола со 92-87, а Хамилтон и Коцовиќ постигнаа по 20 поени за своите тимови. Тиквеш славеше на гостувањето кај Струмица со 75-70.
Работнички е непоразен лидер со 12 бода, пред МЗТ Скопје Аеродром со 11. Шестото коло ќе заврши со натпреварот меѓу ТФТ и Куманово.
