На 69-годишна возраст во неделата почина Џевад Прекази, поранешен фудбалер на Партизан, Хајдук Сплит и Галатасарај и еден од најпознатите изведувачи на слободни удари во поранешна Југославија. Веста ја потврди Партизан, кој истакна дека клубот ја примил „со длабока тага“.
Прекази е роден на 18 август 1957 година во Косовска Митровица. За првиот тим на Партизан играше од 1976 до 1983 година, период во кој одигра 175 натпревари и постигна 23 гола, а со црно-белите освои три шампионски титули и Митропа купот во 1978 година.
Потоа премина во Хајдук, со кој го освои Купот на Југославија во 1984 година, пред да замине во Турција. За Галатасарај играше од 1985 до 1991 година и стана вистинска легенда на клубот, освојувајќи две титули шампион на Турција, во 1987 и 1988 година.
Беше дел од генерацијата на Галатасарај која во 1989 година стигна до полуфиналето на Купот на европските шампиони. Неговиот гол од слободен удар против Монако во четвртфиналето и денес се памети како еден од најубавите моменти во историјата на клубот, пишува Фудбалскиот сојуз на Србија.
„Длабоко сме тажни поради загубата на Џевад Прекази, кој со златни букви го запиша своето име во историјата на Галатасарај“, објави турскиот клуб, кој истакна дека Прекази со своите голови освоил цела генерација навивачи.
Во Истанбул по него е именувана и улица. Според Ен-Ти-Ви, Прекази во едно интервју во 2016 година побарал во ковчегот да му бидат ставени дресовите на Галатасарај и Партизан.
По Галатасарај играше и за Алтај и Бакиркојспор, а по завршувањето на кариерата работеше како тренер на млади фудбалери. Во 2021 година беше член на стручниот штаб на младата репрезентација на Србија.
Во последните години имаше здравствени проблеми и претрпе мозочни удари. Причината за смртта не е официјално соопштена, а времето и местото на погребот ќе бидат објавени дополнително.
