Пари Сен Жермен испиша историја во Лигата на шампионите со победата од 6-0 на гостувањето кај Виљареал. Француските шампиони водеа со 4-0 уште по 17 минути, што е најбрзо постигнати четири гола во историјата на натпреварувањето.
Жоао Невеш го отвори резултатот во 9тата минута, Дезире Дуе зголеми во 12тата, а Сени Мајулу веќе во 13тата минута го постигна третиот гол. Фабијан Руиз во 17тата минута зголеми на 4-0. Претходниот рекорд го држеше Реал Мадрид, кој во 2011 година постигна четири гола за 20 минути против Динамо Загреб.
Руиз во 50тата минута го постигна својот втор гол, а конечниот резултат го постави 17-годишниот бранител Дејвид Боли. Тој влезе во игра во 74тата минута и дебитираше во Лигата на шампионите, а четири минути подоцна се запиша меѓу стрелците.
ПСЖ го постигна овој успех без повредените Усман Дембеле, Маркињос и Нуно Мендеш, како и без Хвича Кварацхелија, кој подолго време отсуствува. Тимот на Луис Енрике е првиот во историјата на Лигата на шампионите што постигнал четири или повеќе гола на четири последователни натпревари.
„Она што се издвојува е начинот на кој го почнавме натпреварот. По брзото 0-4, ниту еден тим не може да се врати. Тешко е за противникот да се разбуди и да направи пресврт“, изјави Луис Енрике, пренесува Еспн.
Шпанскиот стручњак предупреди дека е прерано за големи заклучоци. „Задоволен сум од амбицијата и играта на тимот, но вистинското натпреварување почнува во февруари или март. Во тие елиминациски дуели навистина треба да го докажеш своето ниво“, рече тренерот на ПСЖ.
Боли не ја криеше среќата по дебито. „Кога тренерот ми рече дека влегувам, му реков дека ќе го правам она што секогаш го правам. Ја добив топката од Жоао Невеш, шутирав и видов дека влезе. Беше неверојатно“, изјави младиот бранител за официјалната страница на ПСЖ.
ПСЖ стигна до десетта последователна победа во сите натпреварувања, има максимални 12 бода и три бода предност на врвот на табелата. Во другите натпревари одиграни во вторникот, Интер го совлада Фејенорд со 3-0, Галатасарај го победи Штутгарт со 2-0, Спортинг Лисабон беше подобар од Шахтјор со 1-0, ЛАСК го совлада Слован Братислава со 4-0, а Бодо Глимт и Лил одиграа 0-0, објавува Гардијан.
