Барселона го совлада лидерот Панатинаикос со 76-74 во Атина во 11тото коло од Евролигата, иако пред последната четвртина заостануваше 14 поени. Херој на каталонскиот тим беше Џастин Робинсон, кој 16 од своите 24 поени ги постигна во последните десет минути, пренесува Евролигата.
Домаќините по три четвртини водеа со 57-43, а Барселона во првите 30 минути постигна само 43 поени. Тајриз Мартин го започна пресвртот со седум од првите девет поени на гостите во последната четвртина, а потоа Робинсон ги презеде работите во свои раце. Барселона ја доби последната четвртина со 33-17, објави Барселона.
Американскиот бек ги постигна сите последни 13 поени за својот тим. Со слободни фрлања, тројка и пробив му донесе предност од 73-72 на својот тим на 49 секунди пред крајот, а по новото водство на Панатинаикос од 74-73, Робинсон со тројка на 4,4 секунди пред крајот ја обезбеди победата.
„Да победиш во ваква атмосфера против првиот тим на табелата, тоа е она што сме ние“, изјави Робинсон, кој на натпреварот погоди пет тројки, пренесува Баскетнјуз.
„Им реков на момчињата дека имам чувство, затоа што сметав дека не постигнуваме доволно. Им реков да продолжат да веруваат во тоа што го правиме, па ќе дојдат и отворените и погодените шутеви“, рече тренерот Александар Секулиќ.
Барселона настапи без повредените Кевин Пантер, Тосан Евбуомван, Макунду и Нуњес, но со триумфот стигна до петтата последователна победа во Евролигата и осмата по ред во сите натпреварувања. Мартин заврши со 13 поени и шест скока, а кај Панатинаикос Силвен Франциско постигна 17 поени.
Барселона и Панатинаикос сега имаат по осум победи и три порази, колку што имаат и Валенсија и Олимпијакос на врвот на табелата.
Во другите петочни натпревари, Анадолу Ефес го совлада Виртус со 103-91, а Бешикташ славеше кај Асвел со 95-91, пишува Еурохупс. На Барселона ѝ претстои напорен период со четири натпревари за осум дена.
