Мохамед Салах стана најдобар стрелец во историјата на египетската репрезентација, откако постигна два гола во победата од 5-0 над Малави во квалификациите за Африканскиот куп на нации, пренесува ЕСПН.
34-годишниот напаѓач до рекордот стигна во самиот финиш на натпреварот во Каиро. Прво, во 84та минута, со удар со глава кај далечната статива се израмни со Хосам Хасан, а во петтата минута од судиското продолжение со пенал изведен во стилот „паненка“ го постигна својот 70ти гол за Египет, пишува Франс 24.
Според Египетската фудбалска федерација, Салах го постигна првиот гол по прецизен центаршут на Ибрахим Адел, а пеналот го изнуди младиот напаѓач Хамза Абделкарим.
Египет го реши натпреварот уште во првото полувреме. Насер Махер постигна гол во шестата минута по додавање на Мохамед Хани, Омар Мармуш го зголеми водството во десеттата минута, а Хани со силен удар однадвор од казнениот простор во 39та минута го постави резултатот на 3-0.
Натпреварот беше прв за новиот селектор Али Махер, кој минатата недела го замени Хосам Хасан, сменетиот селектор и досегашен рекордер по бројот на голови за репрезентацијата.
Салах дебитираше за Египет во 2011 година и досега има 123 настапи за репрезентацијата. Поранешниот напаѓач на Ливерпул сега игра за Трабзонспор, за кој оваа сезона постигна девет гола на 11 првенствени натпревари.
За девет години во Ливерпул, Салах стана најдобар стрелец на клубот во Премиер лигата со 191 гол, потсетува ЕСПН.
Египет со седум бода од три натпревари е на првото место во групата Б, со три бода предност пред Ангола, која во сабота игра против Јужен Судан.
