Одбојкарите на Струмица го започнаа настапот во ЦЕВ Челинџ купот со пораз. Македонскиот претставник во четвртокот во Састамала загуби од финскиот Валепа, кој во европските натпреварувања настапува под името Форд Леворанта Састамала, со 0-3 во сетови (13-25, 20-25, 17-25), објави финскиот клуб.
Домаќините доминираа уште од првиот сет, кој го добија убедливо со 25-13. Струмица беше поконкурентна во вториот и третиот сет, но не успеа да направи пресврт.
Најефикасен кај Струмица беше американскиот примач Тејлор Трип со 10 поени. Кристијан Илиев постигна осум, а Филип Маџунков седум поени. Кај Финците најдобар беше Мика Вајсанен со 10 поени, а Никлас Бјорлин и Роланд Џексон додадоа по девет.
Струмица го започна натпреварот со Ефтим Ричлиев, Трип, Митко Спасов, Илиев, Атанасиј Делевски и Маџунков, со Стефан Маглешев како либеро, а од клупата влезе Филип Станков.
„Знаевме дека домаќините се силен, врвен фински тим. Секогаш можеме да бидеме подобри и да играме посилно на следниот натпревар. Ќе се одмориме за викендот по долгото патување, рано следната недела ќе работиме во теретана, а во средата ќе видите освежена Струмица“, изјави Трип.
Реваншот е закажан за среда, 18 ноември, во Струмица. Пласманот во следниот круг се одлучува според бројот на добиени натпревари, а доколку секоја екипа добие по еден меч, ќе се игра таканаречен златен сет.
Финците пред натпреварот ја претставија Струмица како еден од најтрадиционалните и најуспешните македонски клубови, кој минатата сезона го освои третото место во првенството и во купот, пишува Валепа.
Според финскиот клуб, македонскиот тим е составен главно од македонски репрезентативци, како искусниот 31-годишен техничар Ричлиев, 30-годишниот блокер Маџунков и 22-годишниот коректор Илиев, а Трип е единственото засилување од странство оваа сезона.
