Макс Верстапен денеска ќе го стартува спринтот за Големата награда на Сингапур од првата позиција. Трката почнува во 11 часот по македонско време. Возачот на Ред Бул во последниот дел од спринт-квалификациите на патеката Марина Беј извозе круг за 1:31.156 и беше за 0,120 секунди побрз од Џорџ Расел со Мерцедес, а неколку часа подоцна судиите одлучија да не го казнат за инцидентот од првиот дел на сесијата.
Холандецот беше под истрага затоа што го претекна Луис Хамилтон во сектор со жолто знаме. Знамето беше истакнато поради остатоците од болидот на Серхио Перез, кој со Кадилак удри во заштитната ограда во петтата кривина, по што сесијата беше прекината со црвено знаме. Хамилтон веднаш се пожали преку радиото, а Верстапен му порача на тимот дека му ја вратил позицијата на возачот на Ферари.
Судиите во одлуката наведоа дека Верстапен навистина го прекршил правилото, но прифатија дека реагирал соодветно. Според телеметријата, тој целосно го отпуштил гасот во рамките на околу 40 метри по влегувањето во секторот, а Хамилтон во тој момент кочел и возел со брзина под 60 километри на час. Брзината на Верстапен при претекнувањето била за околу 70 километри на час помала отколку во друг негов брз круг, а за да го избегне претекнувањето, морал нагло да закочи, што според него можело да создаде опасна ситуација. Судиите заклучија дека станува збор за несреќна последица од големата разлика во брзините и не изрекоа казна, иако насоките на ФИА за такво прекршување во квалификациите вообичаено предвидуваат губење на пет места на стартот.
Зад Верстапен и Расел, во вториот ред ќе стартуваат Шарл Леклер со Ферари, кој заостана 0,243 секунди, и Оскар Пјастри со Мекларен. Ландо Норис е петти, а Хамилтон, кој во последниот дел излезе рано и од второто место падна на шестото, ќе стартува веднаш до него. Лидерот во шампионатот Андреа Кими Антонели, кој вози со надградениот Мерцедес, заврши седми, со заостанување од дури 0,573 секунди зад тимскиот колега Расел, кој вози со постарата спецификација на болидот.
„Имаме одредени тешкотии со болидот на нерамнините, но барем кога преминавме на меките гуми, болидот стана малку постабилен на местата каде што претходно не бевме сигурни. Не го очекував ова, но го земате, секако дека сум среќен. Квалификациите утре сè уште се главната цел, а за нас стартот е секогаш критичен момент, но барем денот заврши позитивно“, изјави Верстапен, кој пред една недела во Малезија ја донесе првата победа во сезоната за себе и за Ред Бул. Ова му е прва пол-позиција во Сингапур во кој било формат на квалификации.
Сесијата ја обележа и нова грешка на ФИА. Поради човечка грешка во контролата на трката, режимот за претекнување по прекинот со црвено знаме не бил достапен, а потоа бил вклучен на само 27 секунди и повторно исклучен. Од ФИА признаа дека грешката влијаела врз дел од болидите, во зависност од тоа кога и каде на патеката го возеле својот круг, но нагласија дека вториот и третиот дел од квалификациите не биле засегнати.
Меѓу оштетените беше Карлос Саинз, кој со Вилијамс испадна уште во првиот дел. „Половина од болидите го возеа кругот со мотор побрз за половина секунда од другите“, рече Шпанецот, кој сепак призна дека и без проблемот најверојатно немало да помине понатаму. Во првиот дел испаднаа и Арвид Линдблад со Рејсинг булс и Ленс Строл со Астон Мартин, додека Фернандо Алонсо помина понатаму и на крајот беше 15ти.
Во таборот на Мерцедес со загриженост гледаат на надградбата што ја донесоа во Малезија. „Уште на тренингот имав проблеми. Болидот е многу тежок, многу непредвидлив, многу е тешко да се состави добар круг. Не гледам каде можеме да најдеме седум десетинки, но никогаш не се знае“, рече Антонели, кој пред викендот имаше 84 бода предност пред Расел. Британецот, пак, во неделната трка ќе стартува од зачелјето поради казната за новата погонска единица.
Извори: RaceFans, BBC Sport, Formula1.com
