Бојкотот на најдобрите српски ватерполисти продолжува. Единаесетте играчи кои во Белград ја освоија европската титула и натаму не сакаат да настапуваат за репрезентацијата сè додека на чело на сојузот е Слободан Соро, пренесува белградскиот Спорт клуб.
Новиот селектор Владимир Вујасиновиќ се надеваше дека времето ќе ги смири страстите и дека искусните репрезентативци ќе се вратат. Сепак, по разговорите со капитенот Никола Јакшиќ и со Душан Мандиќ, му стана јасно дека нивниот став од мај засега нема да се промени.
Вујасиновиќ потоа им испратил електронска порака на останатите играчи, во која ја констатирал состојбата, им посакал успешна клупска сезона и најавил дека во наредниот период ќе смета на составот што освои бронза на Медитеранските игри во Таранто.
На списокот на отсутни се додаде уште еден играч. Никола Лукиќ, кој не го потпиша писмото, нема да биде на располагање поради суспензија за дисциплински прекршок, со што бројот на европски шампиони кои нема да играат за Србија се искачи на 12.
Надвор од репрезентацијата се Никола Јакшиќ, Душан Мандиќ, Страхиња Рашовиќ, Сава Ранѓеловиќ, Ѓорѓе Лазиќ, Немања Вицо, Никола Дедовиќ, Виктор Рашовиќ, Петар Јакшиќ, Радослав Филиповиќ, Радомир Драшовиќ и Никола Лукиќ. Од шампионскиот состав, на располагање на селекторот се само Милан Глушац, Василије Мартиновиќ и Милош Ќук.
Кризата започна неколку дена по изборот на Соро за претседател на 29 април. Прво замина селекторот Урош Стевановиќ, а потоа единаесет играчи потпишаа заедничко писмо во кое соопштија дека нема да играат за националниот тим додека Соро и неговиот тим го водат сојузот. Според Моцарт спорт, незадоволството го предизвикала изјавата на поранешниот голман на Бразил дека европското злато било „моментална инспирација“.
Сојузот во меѓувреме го смени официјалното име во Српски ватерполо сојуз, а ја потврди и актуелната состојба. Пред Србија се Светскиот куп и Светското првенство, преку кои репрезентацијата се надева дека ќе стигне до Олимписките игри во Лос Анџелес во 2028 година.
Извори: Total Waterpolo, B92, Mozzart Sport
