Манчестер Јунајтед ќе добие големо засилување порано отколку што се предвидуваше. Златан Ибрахимовиќ ќе се врати на теренот пред почетокот на новата година.
„Златан е лав, вистински борец. Целото време беше бесен и поради тоа брзо заздравува. Како што очекувавме, го намали времето на заздравување и до крајот на годината ќе го видиме на теренот“- коментираше Мурињо во изјава за „Скај Спортс“.
Искусниот шведски напаѓач во април ги скина лигаментите на коленото на натпревар од Лигата на Европа против Андерлехт, а многумина после тоа му предвидуваа крај на кариерата. Наместо тоа, Ибра го продолжи договорот со Манчестер Јунајтед и во следните шест месеци ќе остане „Ѓавол“.
Добри вести стигнуваат од сите страни за Мурињо. „Сан“ тврди дека Ибра и Погба ќе бидат подготвени за дуелот со Њукасл, додека пак Маркос Рохо вчера го одигра својот прв натпревар по долгата пауза поради слична повреда како таа на Ибрахимовиќ.
