Руската репрезентација имаше убедлив настап против Саудиска Арабија на отворањето на Светското првенство на стадионот „Лужники“ во Москва.
„Зборнаја“ очекувано беше надмоќна во текот на целиот натпревар и без никаков проблем славеше против Саудиска Арабија.
Русите го отворија натпреварот уште во 12. минута со голот на Газински кој ја искористи асистенцијата на Головин и со глава го матираше голманот на Саудиска Арабија. На 2:0 зголеми Денис Черишев со одличен гол на две минути пред крајот на првиот дел.
На 3:0 зголеми напаѓачот на Зенит, Дзјуба во 71. минута, а последните два гола на домашниот тим беа вистински мајстории. Најпрво Черишев во 91. минута со одличен удар зголеми на 4:0, а конечниот резултат го постави Головин со гол од слободен удар.
