Првакот на Холандија, Ајакс, позади себе има фантастична сезона.
Под водство на Ерик Тен Хаг, тимот на Ајакс ја освоија титулата за првак на Холандија, Холандскиот Куп, а „секунди“ ги делеа од прагот на финале на Лигата на Шампионите.
Екипа на Ајакс ги побара симпатиите на сите љубители на фудбалот ширум Европа, а голем број на фудбалери од овој тим ова лето ќе направат големи трансфери.
Меѓу оние кои ќе заминат е и чудесниот штопер, Матијас Де Лигт (19), кој исто како и Френки Де Јонг треба да стане член на Барселона.
Раководството на Ајакс работи со полна пареа за да пронајде соодветни замени за овие фантастични млади играчи, а се смета дека за Де Лигт веќе е пронајдена и тоа во Аргентина.
Новиот член на великанот од Амстердам ќе биде 21 годишниот аргентински штопер Лисандро Мартинез, неговиот трансфер е договорен и во наредните денови тој ќе потпише договорот со Ајакс.
Холандскиот тим за неговите услуги ќе издвои седум милиони евра, што секако е многу добра цена за квалитетниот аргентински фудбалер.
Мартинез дебитираше и за репрезентацијата на Аргентина и во наредните години би требало да биде носач на играта на дефанзивниот ред на Гаучосите.
