Фантастичната американска кошаркарка Девана Бонер, која го носи дресот на Конектикат Сан, ќе заигра за Македонија на турнирот кој неделава се одржува во Рига.
Искусната 33-годишна кошаркарка зад себе има една од најдобрите сезони во женската верзија на НБА-лигата и таа е трет стрелец во најсилната женска лига во светот.
Бонер минатата сезона во просек постигнуваше по 19,7 поени по натпревар, а притоа има и 7,8 скокови по меч.
„Имав неколку тренинзи со тимот, прво во Охрид, па сега и во Рига, а се надевам дека ќе бидам доволно подготвена за натпреварите. Ова е првпат да се сретнам со тренерите и тимот. Девојките се млади и работат напорно. Среќна сум што сум тука. Не ги познавам многу Хрватска и Германија, но се надевам на победи“, вели Американката.
