УЕФА потврди дека од Реал Мадрид примила обемен пакет документи поврзани со тековната истрага за случајот Негреира и Барселона. Етичките и дисциплинските инспектори ќе ги проценат материјалите како дел од постојната постапка, пренесува ESPN.
Плаќањата на Барселона кон компании поврзани со Хосе Марија Енрикес Негреира, поранешен потпретседател на Техничкиот комитет на судии во Шпанија, се предмет на истрага на УЕФА од 2023 година, паралелно со кривична постапка во Шпанија. Барселона тврди дека станува збор за технички извештаи за судиите.
Реал Мадрид во соопштението оцени дека документите се однесуваат на настани од „вонредна сериозност“ што го засегаат интегритетот на натпреварувањето и довербата во судискиот систем. Клубот бара истрагата да заврши итно и со соодветни одлуки.
Барселона одговори дека не станува збор за нова, повторно отворена или реактивирана постапка. Според каталонскиот клуб, постапката трае од 2023 година, никогаш не била затворена, а УЕФА само го потврдува приемот на документи во рамки на тековната истрага.
Барселона додаде дека досега нема нови барања од инспекторите ниту препратена жалба од Реал и дека постапката останува поврзана со исходот од кривичниот предмет во Шпанија.
Случајот повторно ги заостри односите меѓу двата клуба. Претседателот на Реал, Флорентино Перес, претходно тврдеше дека клубот собира докази за УЕФА и јавно ги критикуваше соперниците од Ла Лига.
За европскиот фудбал ова е нов круг во афера што трае со години. Следниот чекор е кај инспекторите на УЕФА - дали и како ќе ги користат новите материјали во тековната постапка.
