Бојан Миовски и Јани Атанасов на прес-конференцијата пред дуелот со Шкотска во Лигата на нации побараа поддршка од публиката на Националната арена „Тодор Проески“, пренесува Спортманија.
Миовски, кој на клупско ниво игра за Ренџерс, рече дека резултатите не се посакувани, но дека екипата е сплотена и мора да верува во своите квалитети.
„Немаме посакувани резултати, но сплотени сме и на терен треба да покажеме подобра игра. Шкотска е одлична селекција. Беа дел и на Светското првенство иако не се покажаа во вистинско светло. И тие се во криза, немаат дадено гол и се под притисок. Ние мора да веруваме во нашите квалитети“, изјави Миовски.
Атанасов додаде дека атмосферата во националниот тим останува добра и дека играчите ветуваат максимум за навивачите.
„Имаме лоши резултати, секако дека постои разочарување, но секогаш кога сме во националниот тим, атмосферата е добра. Ние сме селекција која ја краси заедништво, но мора да ја подобриме желбата. Ветуваме дека ќе направиме се за да ги израдуваме навивачите“, рече тој за SportSport.
Селекторот Гоце Седлоски посебно се осврна на критиките и јасно ги насочи кон себе и кон федерацијата, а не кон играчите.
„Атмосферата во тимот е добра иако јасно е дека загубивме на првите два меча. Овие дечки заслужуваат поддршка, критиките нека одат на моја сметка, но јас во договор со федерацијата решивме да продолжиме со овој процес кој го започнавме“, изјави Седлоски за Спортманија.
За Шкотска рече дека не треба многу зборови за нивната сила, но дека Македонија е подготвена да покаже карактер и да продолжи во ритамот од мечот со Словенија, каде бил задоволен од играта, но не и од резултатот. Го спомна и долгиот период без гол: боли, но праша што вреди голот ако повторно следува пораз.
