Исмаил Картал повеќе не е тренер на Фенербахче. Истанбулскиот клуб во вторникот соопшти дека искусниот стручњак ја известил управата за својата одлука да се повлече од функцијата, само еден ден по поразот од Галатасарај во дербито од деветтото коло на турското првенство, пренесува агенцијата Анадолија.
„Нашиот тренер Исмаил Картал ја извести управата за својата одлука да се повлече од функцијата“, се вели во соопштението на клубот. Фенербахче наведува дека одлуката е разгледана во духот на меѓусебното разбирање и почит и му се заблагодарува на Картал за придонесот, посветеноста и лојалноста.
Втор обид за оставка оваа есен
Ова не е првпат сезонава Картал да сака да замине. Тој поднесе оставка уште по нерешениот резултат 1-1 против Рома во Лигата на шампионите на 10 септември, но претседателот Азиз Јилдирим тогаш ја одби, а клубот потврди дека тренерот останува на клупата.
Шеесет и петгодишниот Картал се врати во Фенербахче во јуни, за својот четврти мандат на клупата, со едногодишен договор. Со него клубот по првпат од сезоната 2008/09 се врати во главната фаза на Лигата на шампионите.
Фенербахче во понеделникот загуби од Галатасарај со 2-1 на стадионот „РАМС Парк“, а натпреварот заврши со масовна тепачка и два црвени картони. По поразот, тимот падна на петтото место, со шест бода помалку од лидерот, пренесува турскиот портал 12punto.
Кајт привремено на клупата?
Клубот засега не објави кој ќе го наследи Картал. Според турскиот HT Spor, на натпреварот против Ѓозтепе во сабота, на стадионот „Чобани“, тимот најверојатно ќе го води поранешниот холандски репрезентативец Дирк Кајт, иако клубот сè уште официјално не соопштил ништо за новиот тренер.
Во меѓувреме, дисциплинската комисија на турската федерација ги повика на одговорност двата клуба поради настаните во дербито, а одбранбениот играч на Фенербахче, Арчи Браун, е упатен на дисциплинска постапка поради напад.
