Македонскиот репрезентативец Лука Станковски се најде во идеалниот тим на 10тото коло од Премиер лигата на Украина. Играчот од средниот ред на Колос го заслужи местото со гол во гостинската победа од 2-0 над Верес во Ривне, објави Украинската Премиер лига.
Натпреварот на стадионот „Авангард“ започна со еден час задоцнување поради воздушна тревога во Ривне. Колос, предводен од тренерот Руслан Костишин, доминираше во првото полувреме и поведе преку Антон Салабај во 14тата минута, додека домаќинот во првиот дел немаше ниту еден удар во рамките на голот, пренесува Sport24.
Прв гол во украинското првенство
Во 53тата минута Салабај го изведе Станковски сам пред голманот, а Македонецот не ја пропушти шансата и ги урна надежите на Верес за враќање во натпреварот. Тоа беше неговиот прв гол во дресот на Колос и прв во украинското првенство.
Станковски игра за Колос од зимата 2026 година. Според украинските медиуми, тој досега има 11 натпревари, еден гол и една асистенција за клубот од Ковалевка. Покрај него, во идеалниот тим на колото се најде и неговиот соиграч Салабај.
Во гласањето на УПЛ за најдобар играч на колото, Салабај заврши на второто место, зад Сапутин, а двајцата фудбалери на Колос влегоа во официјалната идеална единаесеторка.
За Верес ова беше трет пораз по ред во украинското првенство.
