Македонскиот борец Горјан Гого Славески повторно влегува во рингот на најголемата светска организација за борби без ракавици. Тој ќе се соочи со Американецот Џо „Хитмен“ Елмор во ко-главната борба на приредбата БКФЦ 97, закажана за 11 декември во „Хард рок лајв“ во Холивуд, Флорида.
Дуелот ќе се одржи во велтер категорија и нема да биде борба за титула. Главната борба на вечерта е меѓу Брајс Хенри и Клеј Колард, пренесува Мидл изи.
„Гого Славески сака да врши притисок. Џо Хитмен Елмор, пак, не е тип што се повлекува“, најавија од организацијата, која очекува жесток судир уште од првиот гонг.
Славески во БКФЦ има учинок од осум победи и еден пораз. Тој е поранешен шампион во велтер категорија, но појасот му беше одземен откако во декември 2023 година прифати борба надвор од организацијата. Во последниот настап, на 4 јуни, го победи Џони Тељо со одлука на судиите, откако двапати го собори противникот.
Елмор во борбите без ракавици има две победи и пет порази, но зад себе има богато искуство со 25 професионални борби во мешаните боречки вештини, меѓу другото и во организациите Белатор и ЛФА. Последен пат се бореше на 7 февруари против Мајк Ричман.
Борбите во БКФЦ се одржуваат без ракавици, само со завои на рацете, во кружен ринг. Дуелите вообичаено се одвиваат во пет рунди по две минути, што бара голема издржливост, но и прецизност во ударите, бидејќи секоја грешка може скапо да чини.
На истата приредба ќе се соочат и Џесика Ај и Дезире Јанез, Брендон Алфано и Алекс Дејвис, како и Мурат Казган и Израел Родригез, покажува најавата на БКФЦ.
За Славески ова е можност да се надоврзе на победата против Тељо и да ја забележи деветтата победа во БКФЦ.
