Шкотскиот репрезентативец Скот Мектоминеј откри дека два дена пред првиот натпревар на Шкотска на Светското првенство, против Хаити во јуни, морал да прими третман поради неправилен срцев ритам, пренесува Би-би-си.
„Морав да одам на електрошок на срцето. Тоа беше два дена пред натпреварот со Хаити. Се подготвував толку добро, бев во одлична форма и тогаш се случува вакво нешто. Си мислиш, како ова ми се случува мене“, изјави 29-годишниот играч на Наполи на прес-конференцијата во Глазгов.
„Бев сто отсто подготвен, но кога седиш во болнички кревет два дена пред првиот натпревар на Светското првенство и треба да те стават под анестезија, тоа не е идеално, нели“, додаде тој.
Тогаш од шкотскиот табор соопштија дека Мектоминеј пропуштил тренинг поради стомачни проблеми. Тој ги одигра сите три натпревари на Шкотска на Светското првенство, победата од 1-0 над Хаити во Масачусетс и поразите од Мароко и Бразил, по што Шкотска испадна уште во групната фаза, наведува Скај спорт.
Проблемот со срцевиот ритам повторно се појави во август, кога веќе играше за Наполи. По првите два натпревари во Серија А, Мектоминеј беше подложен на аблација, минимално инвазивна интервенција за корекција на срцевиот ритам, која беше изведена во Манчестер во септември. Поради тоа ги пропушти првите четири натпревари на Шкотска во Лигата на нациите под водство на новиот селектор Себастиен Покоњоли.
„Добро сум. Се чувствувам многу, многу подобро отколку порано. Мислам дека тоа требаше да се направи. Однадвор изгледа многу полошо, но тоа беше релативно едноставна интервенција, која помина навистина добро. Само сум среќен што повторно играм фудбал“, рече Мектоминеј.
Откако се врати на теренот, тој ги одигра сите девет натпревари на Наполи по претходната репрезентативна пауза и постигна пет гола.
Шкотска во петок, 13 ноември, на Хемпден парк ќе ја пречека Македонија во Лигата на нациите, а натпреварот ќе почне во 20:45 часот. Три дена подоцна Шкотите ќе гостуваат кај Швајцарија, пишува Гардијан.
