Египетската фудбалска федерација го смени селекторот Хосам Хасан, а на негово место го назначи Али Махер. Одлуката беше донесена во саботата, по состанокот на управниот одбор на федерацијата.
Федерацијата како причина наведе „негативно влијание врз позитивниот имиџ на тимот“, без дополнителни објаснувања, пренесува Асошиејтед прес. Во соопштението се додава дека стабилноста на репрезентацијата е приоритет за кој нема компромис.
„Федерацијата му се заблагодари на Хосам Хасан за трудот во периодот додека го водеше тимот и му посака успех во следната фаза од кариерата. Управата го назначи Али Махер за селектор на репрезентацијата за наредниот период“, стои во соопштението што го пренесува Си-Ен-Еј.
Шеесетгодишниот Хасан неодамна го продолжи договорот до 2030 година, откако го одведе Египет до осминафиналето на Светското првенство. Таму Фараоните ја забележаа првата победа на Мундијал против Нов Зеланд, ја елиминираа Австралија по изведување пенали, а потоа загубија од Аргентина со 3-2.
Хасан, кој е најдобар стрелец во историјата на египетската репрезентација, ја презеде клупата во февруари 2024 година од Руи Виторија. Ја водеше репрезентацијата на 38 натпревари, забележувајќи 21 победа, десет ремија и седум порази. Претходно ФИФА го казни со суспензија од три натпревари поради критиките кон судијата по поразот од Аргентина.
Според египетските медиуми, на одлуката влијаеле и неговите приватни проблеми, поради кои Советот за медиуми минатата недела му забрани појавување во медиумите, пишува 3Њуз.
Педесет и двегодишниот Махер доаѓа од Керамика Клеопатра, која е четврта во египетското првенство. Веднаш го очекуваат два натпревари против Малави во квалификациите за Афричкиот куп на нации, на 13 и 17 ноември, а Египет е прв во групата Б.
